Waamicha Hiriira Nagaa Qeerroo Oromoo Irraa Kenname

WAAMICHA HIRIIRA NAGAA QEERROO OROMOO IRRAA Filannoo Oromoon Keessa hin Jirre Oromiyaa Keessatti hin Gaggeeffamu Uummanni Oromoo cabiinsa isaa jaarraa kudha saglaffaa irraa eegalee mirga isaa deebifachuuf qabsoo hadhaawaa gochaa yeroo ammaa kana irra gahee jira. Yeroo dheeraa kana keessa carraaleen isa mudatan ormaan irraa fudhatamanii maraammartoo qabsoo wareegama qaalii isa kaffalchiisan keessa seenaa ture. Kan baroota durii yoo dhiifne, bara 2006 irraa eegalee qabsoo gaggeesseen ijoollee isaa kumaatamaan itti wareegee sirna abbaa irree alagaan hogganamu ofirraa gatee jijjirama fiduu danda’ee jira. Haata’u malee warroonni jijjiirama kana gara sirna dimookirasii fi bilisummaa dhugaattii akka ceesisaniif amaanaan itti kenname daandii irraa maqsuudhaan sirna abbaa irree haaraa kan alagaa firoomfatee Oromoo diinomfate ijaaruuf carraaqa jiran. Uummanni, hayyoonni fi hoggantoonni Oromoo deemsi kun dogongora ta’uusaa hubatanii, gorsanii karaatti deebisuudhaaf yaalanii dhageettii waan dhabaniif mormiidhaan dura dhaabbachuun dirqama ta’e. Sirnichis akkuma warra isaan duraa irraa baratetti humnaan cabsuuf waraana bobbaasee Oromiyaa dirree ajjeecha, hidhaafi gadadoo taasise. Yeroo ammaa kanattis filannoon ni godhama jedhamee hafarfamaa kan jiruu yoo ta’es, haalli Oromiyaa keessa jiruu garuu dirreen siyaasaa filannoof mijatu hafe bahanii nagaan galuun sadarkaa hin danda’amnerra gahamee jira. Dhaabbileen siyaasaa saboota biroo dirreen siyaasaa banameefii, waajjira banatanii, bilisaan socho’anii, kaadhimamtoota qopheeffatanii, miidiyaan hayyamameefii sagantaa isaanii beeksifataa jiru. Oromiyaa keessatti garuu qeerroo fi qarreen wareegamanii jijjiiramicha fidan mana hidhaatti guuramanii kanneen hafan biyyaa baqatanii, qaroowwan sabaa kanneen akka Hacaaluu Hundeessaa ajjeefamanii, paartiileen siyaasaa Oromoo gariin shiraan filannoo irraa haqamanii, kanneen hafan lamaan ABO fi KFOn waajjiraaleen isaanii cufamanii, miseensotaa fi hoggantoonni isaanii hidhamanii dirreen siyaasaa itti cufamee filannoo keessaa dhiibamanii bahaa jiru. Kaayyoo qeerroo fi qarreen kumaatamaan itti wareegaman keessa tokkoo fi inni guddaan filannoo bilisa, hirmaachisaa fi dimookraatawaa ta’een bakka bu’oota ofii filataniin ofiin of bulchuu ta’ee osoo jiruu, haala amma jiruun garuu filannichi kan Oromoon keessaa dhiibamee bahee ormi qofti irratti wal filatu ta’uuf deema. Haala kana callisanii ilaaluun kan itti ulfaate hoggantoonni dhaabbilee siyaasaa Oromoo mana hidhaa keessa jiran mormii isaanii agarsiisuuf nyaata eega lagatanii guyyoota kudhanii ol ta’ee jira; fayyaan isaanis haala yaaddeessa keessa jira. Kanaaf nuti qeerroo fi qarreen Oromoo haala armaan olitti ibsame irrattii hundoofnee guutummaa Oromiyaatti hiriira nagaa kan waamne yoo ta’uu guyyaa isaa hanga isin beeksifnutti qophii gochaa akka nu eegdan kabajaan isin beeksifna. Gaaffileen hiriira kanaa 1. Shirri ajjeechaa Artitii keenya qaalii Hacaaluu Hundeessaa qaama walabaan qoratamee dhugaan isaa uummataaf ifa ta’ee, yakkamtoonni qaama kanaan adda bahan seeratti haa dhihaatan. 2. Hidhamtoonni siyaasaa Oromoo bakka kamittiyyuu hidhamanii jiran haal-duree tokko malee atattamaan akka gadi lakkifaman. 3. Waajjiraaleen dhaabbilee siyaasaa Oromoo cufaman marti akka banaman. 4. Guutummaa Oromiyaa keessattii mirgi bilisummaan socho’anii dorgommii filannoo gaggeessuu akka mirkanaa’u. 5. Boordiin Filannoo Biyyoolessaa loogii fi shira dhaabbilee siyaasaa Oromoo irratti raawwatu akka dhaabu kan jedhan ta’u. Guraandhala 1, 2013 Finfinnee, Oromiyaa Qeerroo Oromoo